*०२ अग्निशस्त्रांसह ०१ खंजीर जप्त ; ०३ आरोपींना स्थानिक गुन्हे शाखेकडून अटक.*

   समाजामध्ये शांतता व सुव्यवस्था नांदावी व कायद्याचे राज्य अबाधित राखावे यासाठी वाशिम जिल्हा पोलीस दल सदैव दक्ष असून कायद्याचे पालन न करणाऱ्यांविरोधात सतत कडक कायदेशीर कारवाईचा सपाटा सुरु आहे. काही असामाजिक घटक समाजाची शांतता भंग करण्यासाठी व जनतेमध्ये दहशत निर्माण करण्यासाठी शस्त्रांचा वापर करतात. त्याच्याविरोधात शस्त्र अधिनियम, १९५९ अन्वये कारवाई करण्यात येते.

     या पार्श्वभूमीवर मा.पोलीस अधीक्षक श्री.बच्चन सिंह (IPS) यांच्या सूचना व मार्गदर्शनाखाली विनापरवाना घातक अग्निशस्त्र व धारदार शस्त्र अवैधपणे बाळगल्याप्रकरणी ०३ आरोपीविरुद्ध कलम ३, ४, २५ शस्त्र अधिनियम, १९५९ अन्वये कारवाई करण्यात आली आहे. दि.०९.०६.२०२३ रोजी रात्री पो.नि.सोमनाथ जाधव, स्थानिक गुन्हे शाखा, वाशिम यांना पेट्रोलिंगदरम्यान गोपनीय सूत्रांकडून वाशिम येथील एक युवक त्याच्या इतर दोन साथीदारांसह वृंदावन पार्कमधील एका फ्लॅटमध्ये सोबत विनापरवाना घातक अग्निशस्त्रे व धारदार शस्त्र बाळगून असल्याची खात्रीलायक माहिती मिळाली. त्यानुषंगाने पो.नि.सोमनाथ जाधव यांनी स्थानिक गुन्हे शाखेच्या पथकासह वृंदावन पार्कमधील इमारतीत छापा कारवाई केली. वृंदावन पार्कमधील एका फ्लॅटमधून तीन युवकांना ताब्यात घेत पंचासमक्ष त्यांना त्यांचे नाव गाव विचारून त्यांची अंगझडती घेतली असता त्यांनी त्यांचे नाव १) अभिषेक उर्फ गोलू पवन खळबळकर, वय २८ वर्षे, रा.काळे फैल, वाशिम यांचेकडून एक पिस्टल मॅगझीनसह, २) मकसूद खान मकबूल खान, वय १९ वर्षे, रा.चिपा मोहल्ला, दिल्ली गेट, चितोड, राज्य.राजस्थान याचेकडून एक रिव्हॉलवर व ३) आकाश बबन जाधव, वय २० वर्षे, रा.नागठाणा, ता.जि.वाशिम याचेकडून एक धारदार खंजीर पंचांसमक्ष जप्त करण्यात आले असून त्यांच्यावर पो.स्टे.वाशिम शहर येथे कलम ३, ४, २५ शस्त्र अधिनियम, १९५९ अन्वये कारवाई करण्यात आली आहे.

     सदरची कारवाई मा.पोलीस अधीक्षक श्री.बच्चन सिंह(IPS), अपर पोलीस अधीक्षक श्री.भारत तांगडे यांच्या मार्गदर्शनाखाली पो.नि.सोमनाथ जाधव, स्थानिक गुन्हे शाखा, वाशिम यांचे पथक सपोनि.अतुल मोहनकर, सपोनि.विजय जाधव, पोउपनि.शब्बीर पठाण, पोहवा.गजानन अवगळे, दीपक सोनवणे, पोना.प्रशांत राजगुरू, राजेश राठोड, अमोल इंगोले, प्रवीण राऊत, गजानन गोटे, राम नागूलकर, ज्ञानदेव मात्रे, महेश वानखडे, पोकॉ.निलेश इंगळे, संतोष शेनकुडे, शुभम चौधरी, विठ्ठल सुर्वे, विठ्ठल महाले, दीपक घुगे, मपोहवा.तहेमिना शेख, रेश्मा ठाकरे, संगीता शिंदे, चालक रमेश जामकर, उमेश कांबळे यांनी पार पाडली. नागरिकांनी अश्याप्रकारे विनापरवाना शस्त्र बाळगीत समाजामध्ये भीतीचे वातावरण निर्माण करू पाहणाऱ्या इसमांविरुद्ध न घाबरता समोर येऊन तक्रार देण्याचे आवाहन वाशिम जिल्हा पोलीस अधीक्षक श्री.बच्चन सिंह (IPS) यांनी केले आहे.